06/04/2026
गोव्यातील वाढत्या बेरोजगारी संकटावरून भाजप सरकारचे अपयश उघड: अमरनाथ पणजीकर
पणजी :- सांख्यिकी व कार्यक्रम अंमलबजावणी मंत्रालयाने प्रसिद्ध केलेल्या पीरियॉडिक लेबर फोर्स सर्व्हे (PLFS) च्या ताज्या निष्कर्षांमुळे गोव्यातील मुख्यमंत्री डॉ. प्रमोद सावंत यांच्या नेतृत्वाखालील भारतीय जनता पार्टी सरकारचे अपयश पूर्णपणे उघड झाले आहे.
गोव्यात बेरोजगारी दर 8.3% इतका नोंदवला गेला असून तो राष्ट्रीय सरासरी 3.1% पेक्षा खूपच जास्त आहे. ही केवळ आकडेवारी नसून राज्यातील युवकांसाठी रोजगार निर्माण करण्यात भाजप सरकार पूर्णपणे अपयशी ठरल्याचा स्पष्ट पुरावा आहे, असा आरोप गोवा प्रदेश कॉंग्रेसचे मीडिया चेअरमन अमरनाथ पणजीकर यांनी केला आहे.
मुख्यमंत्री डॉ. प्रमोद सावंत यांनी वर्षानुवर्षे विकास, गुंतवणूक आणि रोजगार निर्मितीबाबत मोठमोठ्या घोषणा केल्या. मात्र प्रत्यक्षात परिस्थिती पूर्णपणे वेगळी आहे. गोव्यातील सुशिक्षित युवक रोजगाराच्या शोधात भटकत आहेत, पात्र व्यक्तींना नोकऱ्या मिळत नाहीत आणि कुटुंबांमध्ये अनिश्चितता वाढत आहे. भाजप सरकार आपल्या आश्वासनांना वास्तवात उतरवण्यात पूर्णपणे अपयशी ठरले आहे, असे श्री. पणजीकर यांनी नमूद केले.
शाश्वत रोजगार निर्माण करण्याऐवजी सरकार केवळ प्रसिद्धीपुरते काम करत आहे आणि जनतेच्या खऱ्या समस्यांकडे दुर्लक्ष करत आहे, अशी टीका श्री. अमरनाथ पणजीकर यांनी केली.
इतर राज्ये प्रगती करत असताना आणि संधी निर्माण करत असताना, प्रचंड क्षमता असूनही गोवा मागे पडत आहे. याचे मुख्य कारण म्हणजे दूरदृष्टीचा अभाव, अपुरी नियोजन आणि चुकीच्या प्राधान्यक्रमांची निवड. भाजपचे तथाकथित “डबल इंजिन” मॉडेल हे गोव्यातील युवकांसाठी “डबल अपयश ” ठरले आहे, असेही त्यांनी म्हटले.
हे सरकार केवळ आर्थिकदृष्ट्या अपयशी ठरले नाही, तर संपूर्ण पिढीच्या अपेक्षांनाही तडा दिला आहे. जे युवक एकेकाळी सरकारकडून आशा बाळगून होते, ते आज निराश आणि हताश झाले आहेत.
भाजप सरकारच्या निष्क्रियतेचा आणि अकार्यक्षमतेचा आम्ही तीव्र निषेध करतो. गोव्याच्या जनतेला उत्तरदायित्व हवे आहे. त्यांना उत्तरं हवी आहेत. आणि सर्वात महत्त्वाचे म्हणजे त्यांना रोजगार हवा आहे असे श्री पणजीकर म्हणाले.
आता वेळ आली आहे की जनतेने या अपयशाची जाणीव करून सरकारला जबाबदार धरावे. गोव्याच्या युवकांचे भविष्य राजकीय दिखावा आणि पोकळ आश्वासनांसाठी बळी देऊ नये असे आवाहन अमरनाथ पणजीकर यांनी केले आहे.
